Kelajakda futbolchilarga maydonda gaplashayotganda og‘zini yopib olish taqiqlanishi mumkinligi haqida gap-so‘zlar tarqalmoqda. O‘tgan haftada bo‘lib o‘tgan «Benfika» — «Real» uchrashuvida Vinisius Janluka Prestiannini irqchilikda ayblagan edi. Biroq argentinalik futbolchi og‘zini libosi (futbolkasi) bilan yopib olgani sababli, vaziyatga aniqlik kiritish ancha qiyin kechmoqda.
«Real» darvozaboni Tibo Kurtua futbolchilarga og‘izni yopib gapirishni taqiqlash ehtimoli haqidagi ma’lumotlarga o‘z munosabatini bildirdi.
«Ba’zan jamoadoshing bilan hech kim eshitmasligi kerak bo‘lgan biror narsani muhokama qilishni istaysan. Ammo agar bu qaror haqoratlarga chek qo‘yish uchun qabul qilinsa — bu juda yaxshi. Ko‘plab sport turlarida o‘yinchilar mikrofon taqib yurishadi... Agar bu irqchilikka barham bersa, men uchun hech qanday muammo yo‘q», — dedi Kurtua matbuot anjumanida.
Eslatib o‘tamiz, «Real» va «Benfika» o‘rtasidagi javob uchrashuvi 25 fevral kuni bo‘lib o‘tadi.
