Келажакда футболчиларга майдонда гаплашаётганда оғзини ёпиб олиш тақиқланиши мумкинлиги ҳақида гап-сўзлар тарқалмоқда. Ўтган ҳафтада бўлиб ўтган «Бенфика» — «Реал» учрашувида Винисиус Жанлука Престианнини ирқчиликда айблаган эди. Бироқ аргентиналик футболчи оғзини либоси (футболкаси) билан ёпиб олгани сабабли, вазиятга аниқлик киритиш анча қийин кечмоқда.

«Реал» дарвозабони Тибо Куртуа футболчиларга оғизни ёпиб гапиришни тақиқлаш эҳтимоли ҳақидаги маълумотларга ўз муносабатини билдирди.

«Баъзан жамоадошинг билан ҳеч ким эшитмаслиги керак бўлган бирор нарсани муҳокама қилишни истайсан. Аммо агар бу қарор ҳақоратларга чек қўйиш учун қабул қилинса — бу жуда яхши. Кўплаб спорт турларида ўйинчилар микрофон тақиб юришади... Агар бу ирқчиликка барҳам берса, мен учун ҳеч қандай муаммо йўқ», — деди Куртуа матбуот анжуманида.

Эслатиб ўтамиз, «Реал» ва «Бенфика» ўртасидаги жавоб учрашуви 25 февраль куни бўлиб ўтади.