«Arsenal» yarim himoyachi Deklan Rays bilan shartnoma muddatini uzaytirishga tayyorgarlik ko‘rmoqda.
«Topskills Sports UK» ma’lumotlariga ko‘ra, London klubi yaqin orada futbolchi bilan yangi uzoq muddatli kelishuv imzolash bo‘yicha muzokaralarni boshlashni rejalashtirgan. Bundan maqsad — «Bavariya» tomonidan o‘yinchiga bo‘layotgan qiziqishga chek qo‘yishdir. «Arsenal» rahbariyati o‘z qarori haqida xabardor qilish uchun Raysning agentlari bilan allaqachon bog‘langan. Agentlar va futbolchining o‘zi «kanonirlar»ning ushbu niyatiga ijobiy munosabat bildirishdi.
Deklan Rays 2023 yilda «Vest Xem»dan 116 million yevro evaziga «Arsenal»ga o‘tgan edi. Uning amaldagi shartnomasi 2028 yilning 30 iyuniga qadar mo‘ljallangan. Joriy mavsumda yarim himoyachi London klubi safida barcha turnirlarda 38 ta o‘yinda maydonga tushib, to‘rtta gol urdi va 10 ta golli uzatmani amalga oshirdi.
