«Real» himoyachisi Raul Asensio YECHL doirasida «Benfika» bilan kechgan javob bahsida (2:1) jiddiy jarohat olishdan qutilib qoldi.

Ikkinchi bo‘limda ispaniyalik futbolchi jamoadoshi Eduardo Kamavinga bilan to‘qnashib ketdi. Shifokorlar Asensioga qariyb 5 daqiqa davomida yordam ko‘rsatishdi, shundan so‘ng uning bo‘yin qismi maxsus fiksator bilan mahkamlanib, maydondan zambilda olib chiqib ketildi.

O‘yindan so‘ng jurnalist Edu Agirre «El Chiringuito» efirida Asensio hushini yo‘qotmaganini, stadiondan esa protokolga muvofiq shifoxonaga olib ketilganini ma’lum qildi. Keyinroq futbolchining o‘zi ijtimoiy tarmoqlarda: «Qo‘llab-quvvatlaganingiz uchun rahmat! Bu shunchaki shok edi», — deb yozib qoldirdi.

Jurnalist Xorxe Pikonning ma’lumotlariga ko‘ra, Asensio o‘tgan tibbiy testlar ijobiy natija ko‘rsatgan, biroq himoyachini hali ham bosh og‘rig‘i bezovta qilmoqda.