«Реал» ҳимоячиси Рауль Асенсио ЕЧЛ доирасида «Бенфика» билан кечган жавоб баҳсида (2:1) жиддий жароҳат олишдан қутилиб қолди.
Иккинчи бўлимда испаниялик футболчи жамоадоши Эдуардо Камавинга билан тўқнашиб кетди. Шифокорлар Асенсиога қарийб 5 дақиқа давомида ёрдам кўрсатишди, шундан сўнг унинг бўйин қисми махсус фиксатор билан маҳкамланиб, майдондан замбилда олиб чиқиб кетилди.
Ўйиндан сўнг журналист Эду Агирре «El Chiringuito» эфирида Асенсио ҳушини йўқотмаганини, стадиондан эса протоколга мувофиқ шифохонага олиб кетилганини маълум қилди. Кейинроқ футболчининг ўзи ижтимоий тармоқларда: «Қўллаб-қувватлаганингиз учун раҳмат! Бу шунчаки шок эди», — деб ёзиб қолдирди.
Журналист Хорхе Пиконнинг маълумотларига кўра, Асенсио ўтган тиббий тестлар ижобий натижа кўрсатган, бироқ ҳимоячини ҳали ҳам бош оғриғи безовта қилмоқда.
