«Inter Mayami» hujumchisi Lionel Messi «Barselona»ga kelajakdagi rejalarini ochiqladi.

38 yoshli futbolchi kataloniyaliklar klubi prezidentligiga nomzodlarning barchasiga futbolchi sifatida jamoaga qaytmasligini ma’lum qildi, deb xabar bermoqda Catalunya Radio. Shu bilan birga, manbaning ta’kidlashicha, argentinalik yulduz faoliyatini yakunlaganidan so‘ng klubga boshqa rolda qaytish ehtimolini inkor etmayapti.

Lionel Messi «Barselona» tizimida 20 yildan ortiq vaqt o‘tkazgan. Forvard 2021 yilning yozida Kataloniya grandi safini tark etgan edi. «Oltin to‘p»ning sakkiz karra sohibining «Inter Mayami» bilan amaldagi shartnomasi 2028 yilning oxirigacha mo‘ljallangan.

Eslatib o‘tamiz, «Barsa»ning yangi prezidenti uchun saylovlar 15 mart kuni bo‘lib o‘tadi.