"Arsenal" APL joriy mavsumida yana burchak to‘pidan gol urdi — bu safar APLning 28-turida "Chelsi" darvozasiga.
Mikel Arteta shogirdlari London derbisida 21-daqiqada hisobni ochishdi. Bukayo Saka burchakdan to‘pni uzoq ustun tomon yetkazib berdi, u yerda Gabriel Magalyaes boshi bilan to‘pni sherigi Vilyam Salibaga tashlab berdi. Fransuz himoyachisi to‘pni darvoza to‘riga yo‘lladi, to‘p Mamadu Sarrga tegib, chiziqni kesib o‘tdi. Gol Saliba hisobiga yozildi.
66-daqiqada esa Deklan Raysning burchakdan uzatgan to‘pi va darvozabon Robert Sanchesning xatosidan so‘ng, Yurriyen Timber to‘pni darvozaga kiritdi.
Bu "to‘pchilar"ning Angliya chempionati joriy mavsumida burchak to‘plaridan urgan 15 va 16-gollari bo‘ldi. Shu tariqa, "Arsenal" liga rekordini takrorladi. Bungacha bir mavsumda burchak to‘plaridan 16 ta golni "Oldxem" (1992/93 yilgi mavsum), "Vest Bromvich" (2016/17) va "Arsenal"ning o‘zi (2023/24) kiritgan edi.













