"Арсенал" АПЛ жорий мавсумида яна бурчак тўпидан гол урди — бу сафар АПЛнинг 28-турида "Челси" дарвозасига.
Микель Артета шогирдлари Лондон дербисида 21-дақиқада ҳисобни очишди. Букайо Сака бурчакдан тўпни узоқ устун томон етказиб берди, у ерда Габриэль Магальяэс боши билан тўпни шериги Вильям Салибага ташлаб берди. Француз ҳимоячиси тўпни дарвоза тўрига йўллади, тўп Мамаду Саррга тегиб, чизиқни кесиб ўтди. Гол Салиба ҳисобига ёзилди.
66-дақиқада эса Деклан Райснинг бурчакдан узатган тўпи ва дарвозабон Роберт Санчеснинг хатосидан сўнг, Юрриен Тимбер тўпни дарвозага киритди.
Бу "тўпчилар"нинг Англия чемпионати жорий мавсумида бурчак тўпларидан урган 15 ва 16-голлари бўлди. Шу тариқа, "Арсенал" лига рекордини такрорлади. Бунгача бир мавсумда бурчак тўпларидан 16 та голни "Олдхэм" (1992/93 йилги мавсум), "Вест Бромвич" (2016/17) ва "Арсенал"нинг ўзи (2023/24) киритган эди.
