"Real Madrid" klubi futbolchilari bosh murabbiy Alvaro Arbeloani tobora kamroq qo‘llab-quvvatlamoqda. Yaqin kelajakda u murabbiylik lavozimidan mahrum bo‘lishi ham mumkin. Muvaffaqiyatsiz natijalar seriyasi «qaymoqranglar» kiyinish xonasidagi muhitga jiddiy salbiy ta’sir ko‘rsatgani haqida The Athletic xabar bermoqda.

Manbaga ko‘ra, Arbeloa kelganidan so‘ng jamoa ruhiyati dastlab yaxshilangan bo‘lsa-da, so‘nggi vaqtlarda La Liga va Ispaniya Kubogi doirasidagi mag‘lubiyatlar 43 yoshli mutaxassisga nisbatan ishonchni susaytirgan. Shunga qaramay, hozircha Arbeloani iste’foga chiqarish masalasi ko‘rib chiqilmayapti. Biroq jamoadagi keskinlik ortib borsa, vaziyat sobiq murabbiy Xabi Alonso bilan kuzatilgan holatni takrorlashi mumkin.

Alvaro Arbeloa joriy yil yanvar oyida «Real»ni boshqaruviga olgan. Uning qo‘l ostida jamoa 12 ta o‘yin o‘tkazib, sakkizta g‘alaba va to‘rtta mag‘lubiyat qayd etgan.