"Atletiko" prezidenti Enrike Sereso "Barselona" vingeri Lamin Yamal haqidagi savolga javob berayotib, mavjud bo‘lmagan futbolchilarni o‘ylab topdi.

Bugun "Barselona" Ispaniya Kubogi 1/2 finalining javob uchrashuvida "Atletiko"ni qabul qiladi (ilk o‘yin – 0:4). O‘yin Toshkent vaqti bilan soat 01:00 da boshlanadi.

O‘yin oldidan madridliklar rahbaridan La Liganing "Vilyarreal"ga qarshi bahsida (4:1) xet-trik qayd etgan Lamin Yamalning sport formasi uni xavotirga solmayaptimi, deb so‘rashdi.

"Bizda Xulian Alvares, Tom Ford, Smit va boshqa ko‘plab futbolchilar bor", – dedi Sereso tabassum bilan (u futbolchilar o‘rniga dunyoga mashhur dizayner va umumiy familiyalarni aytib o‘tgan).

Shuningdek, Sereso "Barselona"ning Alvaresga bo‘lgan qiziqishi haqidagi savolga ham javob qaytardi.

"Men sizga doim aytadigan gapimni takrorlayman: u xuddi Grizmann kabi "Atletiko" futbolchisi va biz bilan shartnomaga ega. Xulian juda qimmat turadi va u sotilmaydi", – deya javob berdi prezident.