Londonning «Arsenal» klubi bosh murabbiyi Mikel Arteta Chempionlar Ligasi 1/8 finali doirasida Leverkuzenning «Bayer» jamoasiga qarshi kechgan o‘yindan (1:1) so‘ng intervyu berdi.
«Kanonirlar» 46-daqiqada gol o‘tkazib yuborishdi va 89-daqiqagacha imkoniyatni boy berib kelishdi. Aynan o‘sha daqiqada Kay Xavers penaltini aniq amalga oshirib, muvozanatni tikladi.
«Biz o‘yin tizginini juda yaxshi nazorat qildik, ammo gol ura olmadik, keyin esa ustunlikni qo‘ldan chiqardik. Raqibga umid berdik va o‘yin butunlay boshqa tomonga burilib ketdi. Biroq so‘nggi 20 yoki 25 daqiqada biz yana yaxshiroq o‘ynay boshladik. Shu sababli, gol urib, mag‘lubiyatdan qutulib qolganimizni haqqoniy natija deb hisoblayman», – dedi Arteta UEFAga bergan intervyusida.
Qarama-qarshilik taqdiri 17 mart kuni «Emireyts» stadionida bo‘lib o‘tadigan javob o‘yinida hal bo‘ladi.
