Londonning «Arsenal» klubi bosh murabbiyi Mikel Arteta o‘z jamoasining irodaviy sifatlarini alohida e’tirof etdi.

Shanba kuni «kanonirlar» o‘z uylarida «Everton»ni mag‘lub etib (2:0), orziqib kutilgan chempionlik sari navbatdagi muhim qadamni tashlashdi. Uchrashuvda hisobni faqat 89-daqiqaga kelibgina Viktor Dyokeresh ochishga muvaffaq bo‘ldi, bahs yakunida esa 16 yoshli Maks Douman oradagi farqni ishonchli ko‘rinishga keltirdi.

«Oxirgi bir necha oy aql bovar qilmas darajada o‘tmoqda. Bu shunchaki ajoyib edi. Biz barcha turnirlarda kurashni davom ettiryapmiz va har bir o‘yinda xuddi oxirgi jang kabi harakat qilyapmiz. Ba’zan a’lo darajada o‘ynaymiz, ba’zan esa u qadar emas, lekin mana shu g‘alabaga bo‘lgan tinimsiz intilish — jamoamizning eng yaxshi fazilatlaridan biridir», — dedi Arteta matbuot anjumanida.