Angliyaning “Manchester Siti” klubi vingeri Jeremi Doku “shaharliklar” hali ham “Real Madrid”ga qarshi bahsni o‘z foydasiga o‘zgartira olishiga ishonishini ma’lum qildi.

“Agar imkoniyat yo‘q desam, bu mening aqldan ozganimni bildiradi. "Real" – juda kuchli jamoa, lekin ular bizga uchta gol urgan bo‘lsa, nega biz ham ularga ura olmaymiz? ‘Etihad’da muxlislarimiz ularga bosim o‘tkazishi kerak. Hamma narsa bo‘lishi mumkin, biz o‘zimizga ishonamiz. Agar muxlislar biz bilan birga bo‘lsa, bu butunlay boshqa darajadagi o‘yin bo‘ladi”, deydi Doku.

Belgiyalik qanot hujumchisi javob uchrashuvi oldidan “Siti” muxlislarini stadionda o‘zgacha atmosfera yaratishga chaqirdi.

Ma’lumot uchun, “Real Madrid” UEFA Chempionlar Ligasi 1/8 final bosqichining dastlabki uchrashuvida “Manchester Siti”ni 3:0 hisobida mag‘lub etdi. “Qirollik klubi” hujumchisi Federiko Valverde uchrashuvda xet-trik muallifiga aylandi.

Mazkur bahsda “Manchester Siti”ning o‘zbekistonlik himoyachisi Abduqodir Husanov asosiy tarkibda maydonga tushib, to‘liq 90 daqiqa harakat qildi.

Jamoalar o‘rtasidagi javob uchrashuvi 17 mart kuni Manchesterdagi “Etihad” stadionida bo‘lib o‘tadi. Uchrashuv Toshkent vaqti bilan 18 martga o‘tar kechasi soat 01:00 da boshlanadi.