Ispaniya terma jamoasining sobiq futbolchisi David Silva Chempionlar ligasi 1/8 finalidagi «Real» — «Manchester Siti» qarama-qarshiligi haqida fikr bildirdi. Ilk uchrashuvda madridliklar 3:0 hisobida g‘alaba qozongan.

«Hammamiz bilamizki, «Real» Chempionlar ligasida butunlay boshqacha o‘ynaydi. Chempionatdagi natijalari avvalgi mavsumlarga nisbatan unchalik yaxshi bo‘lmasa ham, bu turnirda jamoa doim kuchli ko‘rinadi. Ko‘pchilik «Siti» safarda yaxshiroq natija ko‘rsatishini kutgandi, ammo oldinda yana javob o‘yini bor. Umid qilamanki, ular tez gol urib, o‘yinga qayta oladi.

Bu qarama-qarshilik taqdiri hal bo‘ldimi? Yo‘q. Agar «Siti» o‘yinning ilk daqiqalaridan bosim o‘tkazib, gol ursa, ular yana kurashga qaytadi. Boshqa masala — «Real» dastlabki 25 daqiqa davomida gol o‘tkazmasdan turib bera oladimi. Agar shunday bo‘lsa, o‘yin tinchlanadi. Ammo agar ular gol o‘tkazib yuborsa, muammolar paydo bo‘ladi», — dedi Silva AS nashriga bergan intervyusida.