18 mart kuni UYEFA Chempionlar ligasi 1/8 final bosqichining so‘nggi javob o‘yinlari bo‘lib o‘tdi. Shundan so‘ng, Opta statistik kompaniyasining superkompyuteri jamoalarning ushbu turnirdagi g‘alaba qozonish imkoniyatlari bo‘yicha yangi hisob-kitoblarni amalga oshirdi.
O‘tgan yilgi finalda Milanning «Inter» klubini mag‘lub etgan musobaqaning amaldagi g‘olibi — «PSJ» — bu safar bor-yo‘g‘i 11,87% imkoniyat bilan to‘rtinchi o‘rinni egalladi. Avvalgi hisob-kitoblarda bo‘lgani kabi, birinchi o‘rin Londonning «Arsenal» klubiga nasib etdi (29,73%). Keyingi o‘rinlardan esa «Bavariya» (18,33%) va «Barselona» (15,66%) joy oldi.
Boshqa jamoalar — «Real», «Liverpul», «Atletiko» va «Sporting»ning chempionlik imkoniyatlari 10% dan past baholandi.
Eslatib o‘tamiz, chorak finalda «Real» – «Bavariya», «Sporting» – «Arsenal», «Barselona» – «Atletiko» hamda «PSJ» – «Liverpul» juftliklari o‘zaro bahs olib borishadi.
