«Galatasaroy»ni 4:0 hisobida mag‘lub etgan «Liverpul» Chempionlar ligasining chorak finaliga yo‘l oldi. Umuman olganda esa, mersisaydliklar ushbu mavsumda barqaror o‘yin namoyish eta olmayaptilar.

The Touchline nashrining xabar berishicha, jamoaning beqaror formasiga qaramay, «Liverpul» rahbariyati hamon Arne Slotga imkoniyat berish niyatida — hech bo‘lmaganda joriy mavsum yakuniga qadar.

Shu bilan birga, vaziyat keyingi safar aprel oyida — Chempionlar ligasi chorak finali doirasidagi «PSJ»ga qarshi bahslardan so‘ng qayta ko‘rib chiqilishi ta’kidlanmoqda.

«Liverpul» navbatdagi uchrashuvini shanba kuni, 21 mart sanasida Angliya Premyer-ligasi doirasida safarda «Brayton»ga qarshi o‘tkazadi. O‘yin Toshkent vaqti bilan soat 17:30 da boshlanadi.