«Liverpul» klubi Chempionlar ligasi 1/8 finalining javob uchrashuvi paytida «Enfild» stadionida «Galatasaroy» yarim himoyachisi Noa Lang olgan jarohat yuzasidan surishtiruv o‘tkazadi. Bu haqda The Athletic nashrining X ijtimoiy tarmog‘idagi sahifasi xabar bermoqda. Uchrashuv maydon egalarining 4:0 hisobidagi g‘alabasi bilan yakunlangan edi.
O‘yinning 75-daqiqasida Lang maydon chetidagi reklama qalqoniga urilib ketib, barmog‘idan jarohat oldi. Futbolchida kuchli qon ketishi kuzatildi va u bir muddat maydonda yotib qoldi. Uni maydondan zambilda olib chiqib ketishdi. Mersisaydliklar shikastlanish aynan qanday sodir bo‘lgani va bu jarohatning oldini olish imkoniyati bor-yo‘qligini o‘rganishmoqda.
Qayd etish joizki, turk klubi yarim himoyachisida jiddiy yirtilish (kesilish) aniqlangan.
