O‘zbekiston Superligasining 4-turidan o‘rin olgan «Buxoro» — «Dinamo» (3:1) uchrashuvidan so‘ng, Samarqand jamoasi bosh murabbiyi Vadim Abramov ishtirokida matbuot anjumani o‘tkazildi. Quyida tajribali mutaxassisning o‘yin va jamoadagi ichki holat borasidagi fikrlari bilan tanishishingiz mumkin.

— O‘yin haqida nima deya olasiz? — Avvalo, raqibni g‘alaba bilan tabriklayman. Bugun «Buxoro»da zafar quchishga bo‘lgan ishtiyoq kuchliroq ko‘rindi. Bizga aynan shu narsa yetishmadi. Vaqtidan oldin «qo‘l ko‘tardik», bu esa yakunda mag‘lubiyatga olib keldi.

— Ro‘ziqul Berdiyev «Dinamo» faqat 70 daqiqa futbol o‘ynayapti, degan fikrni bildirgandi. Bunga qo‘shilasizmi? Shuningdek, terma jamoaga nomzod Jahongir O‘rozovning bugungi o‘yini haqida nima deysiz? — Bu savollarga hozir javob berish men uchun mushkul. Aslida, savolning ichida javobni o‘zingiz berib bo‘ldingiz. Keyingi savolga o‘taqolaylik.

— O‘tgan yilgi «Dinamo»ning mazmunli o‘yinidan asar ham qolmayotgandek... — Bunga ham javob berish oson emas. Ko‘rib turganingizdek, o‘yinga o‘zini baxsh etish yetishmayapti. Men futbolchilarga har safar baqira olmayman. Qancha vaqt davomida futbol o‘ynaganimizni ham aniq ayta olmayman.

— Jamoaning o‘yinida barqarorlik yo‘q, buning sababi nimada? — O‘tkazib yuborilgan ikkita gol jamoaga ruhiy jihatdan qattiq ta’sir qildi. Bunday xatolarga yo‘l qo‘ymasligimiz kerak edi. Endi o‘yinni qayta ko‘rib, tahlil qilamiz va sabablarini qidiramiz.

— O‘yindan oldin maydon holatidan norozi edingiz... — Menimcha, bunday holatdagi maydonda futbol o‘ynashga boshqa ruxsat berishmasa kerak. Bu mavzuda ortiqcha gapirishni istamayman.

— Futbolchilarda ishtiyoq so‘ngani sezilmoqda. Homiylarning e’tiborsizligi bunga sabab bo‘lyaptimi? — Men futbolchilar oldida ham rahbar, ham murabbiyman. Xo‘sh, bu vaziyatda ularga nima deyishim kerak? Ertaga bayram, shunday kunda hammaning kayfiyatini tushirishim kerakmi? Bu bilan biror narsa o‘zgaradimi? Mening futbolchilarga e’tirozim yo‘q, chunki ular ham oilasini o‘ylaydi. Ularning ro‘zg‘orini kim boqadi? Savollar juda ko‘p, ammo javoblar tubsizlikka ketib qolgan.