Madridning «Real» klubi hujumchisi Kilian Mbappe jarohatidan so‘ng ilk bor asosiy tarkibda maydonga tushishga tayyorlanmoqda.

Fransiyalik futbolchi tizzasidagi muammolar sababli beshta o‘yinni o‘tkazib yubordi, yaqinda Chempionlar ligasi doirasida «Manchester Siti»ga qarshi kechgan bahsda esa zaxiradan maydonga tushdi. Diario AS nashrining ma’lumotiga ko‘ra, «qaymoqranglilar» bosh murabbiyi Alvaro Arbeloa bo‘lajak «Atletiko»ga qarshi derbida yulduz forvardni ilk daqiqalardan o‘ynatmoqchi. Uchrashuv yakshanba kuni bo‘lib o‘tadi va Toshkent vaqti bilan tungi soat 01:00 da boshlanadi.

Kilian Mbappe joriy mavsumda «Real» safida o‘tkazilgan 34 ta o‘yinda 38 ta gol va oltita golli uzatmani o‘z hisobiga yozdirib qo‘ydi. Yaqinda 27 yoshli futbolchi Fransiya terma jamoasining mart oyida Braziliya va Kolumbiyaga qarshi kechadigan o‘rtoqlik uchrashuvlari uchun chaqiruv oldi.