Madridning «Real» klubi bosh murabbiyi Alvaro Arbeloa darvozabon Tibo Kurtua jarohatidan so‘ng safga qaytishi uchun klub tomonidan hech qanday muddat belgilanmaganini ta’kidladi.

Tibo Chempionlar ligasi 1/8 finali doirasidagi «Manchester Siti»ga qarshi javob uchrashuvining (2:1) tanaffus paytida almashtirilgan edi. Ommaviy axborot vositalarining ta’kidlashicha, darvozabon o‘yinoldi chigalyozdi mashqlari paytidayoq og‘riq sezgan.

«Biror o‘yinchini maydonga tushirayotganimda doim tavakkalchilik bo‘ladi. Juda kam sonli futbolchilar maydonga 100 foiz tayyor holda va hech qanday noqulayliksiz tushadilar. Bu normal holat. «Manchester Siti» bilan o‘yin tanaffusida Tibo o‘yinni davom ettirishni istagandi, biroq uni to‘xtatishga shaxsan o‘zim qaror qildim. Bunga sabab, shuningdek, Luninga bo‘lgan to‘liq ishonchimdir. U ajoyib darvozabon va buni isbotlaydi. Agar tarixdagi eng yaxshi golkiper jarohat olsa, o‘rniga boshqasi tushadi. Biz Kurtuaning qaytishi bo‘yicha hech qanday muddat belgilamayapmiz», — deya Arbeloaning so‘zlarini keltirmoqda AS.

Avvalroq ESPN nashri Kurtua o‘ng oyoq son mushagidagi jarohat tufayli olti haftani o‘tkazib yuborishi haqida xabar bergan edi.