FIFA reytingiga ko‘ra dunyoning eng kuchli o‘nta jamoasi qatoriga kiruvchi Yaponiya ayollar terma jamoasi Osiyoning eng yaxshi jamoasiga aylandi. Hal qiluvchi bahsda ular Avstraliya ustidan g‘alaba qozonishdi.
Uchrashuv taqdirini 17-daqiqada kiritilgan yagona gol hal qildi. Londondagi «Chelsi» klubiga tegishli bo‘lgan (ayni damda «Tottenxem»da ijarada o‘ynayotgan) Mayka Xamano jarima maydonchasi tashqarisidan darvozaning pastki o‘ng burchagiga aniq zarba yo‘lladi. «Manchester Siti» a’zosi Yui Xasegava ushbu golga assistentlik qildi.
Ushbu g‘alaba yaponiyaliklar uchun musobaqa tarixidagi uchinchisi bo‘ldi. Bungacha jamoa 2014 va 2018 yillarda zafar quchgan edi. 2010 yilda oltin medallarni qo‘lga kiritgan Avstraliya esa o‘z tarixida to‘rtinchi bor finalda imkoniyatni boy berdi. Bronza medali uchun bahs o‘tkazilmadi; yarim finalda Xitoy va Janubiy Koreya terma jamoalari mag‘lub bo‘lishgan edi.
