ФИФА рейтингига кўра дунёнинг энг кучли ўнта жамоаси қаторига кирувчи Япония аёллар терма жамоаси Осиёнинг энг яхши жамоасига айланди. Ҳал қилувчи баҳсда улар Австралия устидан ғалаба қозонишди.
Учрашув тақдирини 17-дақиқада киритилган ягона гол ҳал қилди. Лондондаги «Челси» клубига тегишли бўлган (айни дамда «Тоттенхэм»да ижарада ўйнаётган) Майка Хамано жарима майдончаси ташқарисидан дарвозанинг пастки ўнг бурчагига аниқ зарба йўллади. «Манчестер Сити» аъзоси Юи Хасэгава ушбу голга ассистентлик қилди.
Ушбу ғалаба японияликлар учун мусобақа тарихидаги учинчиси бўлди. Бунгача жамоа 2014 ва 2018 йилларда зафар қучган эди. 2010 йилда олтин медалларни қўлга киритган Австралия эса ўз тарихида тўртинчи бор финалда имкониятни бой берди. Бронза медали учун баҳс ўтказилмади; ярим финалда Хитой ва Жанубий Корея терма жамоалари мағлуб бўлишган эди.
