“Manchester Siti” ustozi Xosep Gvardiola uchun futboldagi taktik chizmalar va yangi sovrinlar hozircha ikkinchi darajali masalaga aylangan. Angliya Liga Kubogi finali oldidan o‘tkazilgan matbuot anjumanida murabbiy strategiya haqidagi savolga kutilmaganda global muammolar haqida gapirib javob qaytardi.

Bo‘lajak raqib tahlili o‘rniga, Gvardiola diqqatni dunyodagi inqirozlarga qaratishni afzal bildi. Murabbiyning fikricha, zamonaviy jamiyat futbol kabi ko‘ngilochar sohalarga haddan tashqari berilib ketib, sayyoradagi ortga qaytmas jarayonlarga ko‘z yummoqda.

“Dunyoda sodir bo‘layotgan voqealarga nazar tashlang: biz misli ko‘rilmagan tartibsizliklar girdobiga tushib qolyapmiz, ammo hech kim buni to‘xtatish uchun harakat qilmayapti. Barcha jarayonlar sahna ortida kechmoqda. Dunyo halokat sari bormoqda. Biz esa hamon bu yerda o‘tirib, u yoki bu jamoa yoxud bo‘lajak o‘yin haqida bahslashyapmiz. Bugun dunyoda futboldan ancha muhimroq muammolar mavjud”, deya ta’kidladi Gvardiola.

Eslatib o‘tamiz, Angliya Liga Kubogi finali doirasidagi “Arsenal” — “Manchester Siti” bahsi bugun, 22 mart yakshanba kuni bo‘lib o‘tadi. O‘yin Toshkent vaqti bilan soat 20:30 da start oladi.

Ma’lumot o‘rnida, 28 fevral kuni AQSH va Isroilning Eronga qarshi harbiy amaliyot boshladi. Shuningdek, boshqa mamlakatlar o‘rtasida ham siyosiy vaziyatlar keskin tus olgan.