Misrning “Farko” futbol klubi Afrika Futbol Konfederasiyasi (AFK) shafeligida o‘tkaziladigan barcha musobaqalarda ishtirok etishdan muddatsiz voz kechishini ma’lum qildi. Bunday qarorga tashkilotning 2026-yilgi Afrika Millatlar Kubogi finali natijasini bekor qilib, Marokash terma jamoasini g‘olib deb e’lon qilgani sabab bo‘lgan.

"Farko" futbol klubi AFK Chempionlar Ligasi, AFK Superkubogi va konfederasiya tomonidan ta’sis etilgan boshqa har qanday turnirlarga muddasiz boykot e’lon qiladi”, deyiladi klub rasmiy bayonotida.

Ma’lumot uchun, “Farko” klubi 2010-yilda tashkil etilgan bo‘lib, o‘tgan mavsumda Misr chempionatini yettinchi o‘rinda yakunlagan. Jamoa o‘z tarixi davomida hali biror marta AFK shafeligidagi musobaqalarda ishtirok etmagan.

Avvalroq AFK Afrika Millatlar Kubogi finalida Senegal terma jamoasiga 0:3 hisobida texnik mag‘lubiyat yozib, Marokashni chempion deb e’lon qilgan edi. Bunga senegallik futbolchilarning hakam qaroriga norozilik sifatida maydonni 10 daqiqadan ko‘proq vaqtga tark etgani sabab bo‘lgan.

Final bahsining asosiy vaqtiga qo‘shib berilgan daqiqalarda VAR tizimi orqali Senegalning goli bekor qilingan, ketma-ket ikkinchi marta VARga murojaat qilingach esa senegalliklar darvozasiga penalti belgilangan. Jamoa bosh murabbiyi Pap Tiyav norozilik belgisi sifatida futbolchilarni maydondan olib chiqib ketgan. 15 daqiqadan so‘ng jamoa maydonga qaytgan va darvozabon Eduar Mendi marokashlik Braim Dias tomonidan yo‘llangan penalti zarbasini qaytargan. Uchrashuvning asosiy vaqti 0:0 hisobida yakunlanib, qo‘shimcha bo‘limlarda Pape Gee tomonidan kiritilgan yagona gol Senegalga g‘alaba keltirgan edi.

Hozirda Senegal futbol federasiyasi AFK qarori ustidan Sport arbitraj sudi (CAS)ga shikoyat qilishi kutilmoqda.