«Inter» prezidenti Juzeppe Marotta A Seriyadagi chempionlik poygasi borasida o‘z fikrini bildirdi. «Neradzurrilar» turnir jadvalida peshqadamlik qilmoqda, biroq jamoaning barcha musobaqalardagi g‘alabasiz seriyasi 4 ta o‘yinga yetdi.

«Bu murakkab vaziyat va biz bir necha qadam orqaga tashladik. Ehtimol, bunga jarohatlar yoki charchoq sabab bo‘lgandir, ammo mavsumning ushbu bosqichida bu barcha jamoalar uchun muqarrar holdir. Men bu yerga bahona qidirish uchun emas, balki oxirigacha kurashishimizni tasdiqlash uchun keldim», — deya Marottaning so‘zlarini keltiradi Football Italia.

Marotta adolatsiz hakamlik mavzusiga to‘xtalib o‘tishni istamadi.

«Biz o‘zimizni qurbon qilib ko‘rsatmoqchi emasmiz. Shunchaki, butun futbol manfaati yo‘lida hakamlikda va vaziyatlarni baholashda bir xillik bo‘lishini xohlaymiz. Biz hakamlarning xatolaridan kuchliroq bo‘lishimiz kerak».

5 aprel kuni A Seriyaning 31-turi doirasida «Inter» o‘z maydonida «Roma»ni qabul qiladi.