«Интер» президенти Жузеппе Маротта А Сериядаги чемпионлик пойгаси борасида ўз фикрини билдирди. «Нерадзуррилар» турнир жадвалида пешқадамлик қилмоқда, бироқ жамоанинг барча мусобақалардаги ғалабасиз серияси 4 та ўйинга етди.

«Бу мураккаб вазият ва биз бир неча қадам орқага ташладик. Эҳтимол, бунга жароҳатлар ёки чарчоқ сабаб бўлгандир, аммо мавсумнинг ушбу босқичида бу барча жамоалар учун муқаррар ҳолдир. Мен бу ерга баҳона қидириш учун эмас, балки охиригача курашишимизни тасдиқлаш учун келдим», — дея Мароттанинг сўзларини келтиради Football Italia.

Маротта адолатсиз ҳакамлик мавзусига тўхталиб ўтишни истамади.

«Биз ўзимизни қурбон қилиб кўрсатмоқчи эмасмиз. Шунчаки, бутун футбол манфаати йўлида ҳакамликда ва вазиятларни баҳолашда бир хиллик бўлишини хоҳлаймиз. Биз ҳакамларнинг хатоларидан кучлироқ бўлишимиз керак».

5 апрель куни А Сериянинг 31-тури доирасида «Интер» ўз майдонида «Рома»ни қабул қилади.