Italiya terma jamoasi bosh murabbiyi Jennaro Gattuzo Shimoliy Irlandiyaga qarshi o‘yin oldidan futbolchilar xotirjamlikni saqlashga harakat qilishlari kerak deb hisoblaydi. Italiya jamoasi 26 mart kuni JCH-2026 saralashining o‘tish bosqichi doirasida Shimoliy Irlandiya termasiga qarshi maydonga tushadi.
«Biz xotirjamlikni saqlashimiz kerak. Misol tariqasida «San-Siro»da Norvegiyaga qarshi o‘tkazilgan o‘yinni keltirishim mumkin. Birinchi bo‘limni yaxshi o‘tkazdik, ammo ilk qiyin vaziyatlar yuzaga kelishi bilan bo‘shashdik. Bunday holatlardan qochishimiz zarur va men oxirgi oylarda shu ustida ishlayapman. O‘yinlarda turli ko‘ngilsizliklar bo‘lishi mumkin, biz oldinga intilishni va o‘tmishni unutishni bilishimiz kerak.
Vazminlik zarur. Payshanba kunigacha futbolchilarni doimiy xabarlar va kuniga 10 ta videokonferensiya bilan charchatib yuborishni tasavvur qilolmayman. Biz maydonda nima qilishimiz kerakligini aniq bilgan holda o‘yinga yetib borishimiz lozim.
Bizning ixtiyorimizda sovrinlar, chempionlik unvonlarini qo‘lga kiritgan, Chempionlar ligasi finaligacha yetib borgan va Yevropa chempionatida g‘olib chiqqan futbolchilar bor», — dedi Gattuzo matbuot anjumanida.
