«Real Madrid» himoyachisi Antonio Ryudiger o‘zining o‘yin uslubi haqida fikr bildirdi.

«Men agressiv o‘ynayman, lekin qizil kartochka olish darajasida tavakkal qilmayman. Maydonda nechanchi daqiqa ketayotganini va nima xavf ostida ekanini aniq bilaman. To‘qqiz yil davomida qizil kartochka olmaslik — bu tasodif emas. Hatto ko‘pchilik o‘ylaganchalik ko‘p sariq kartochka ham olmayman. So‘nggi bir necha yil ichida ligadagi bahslarda bir mavsum uchun o‘rtacha beshtaga yaqin ogohlantirish olganman, xolos», — deya Ryudigerning so‘zlarini keltiradi Madrid Xtra.

Joriy mavsumda 33 yoshli germaniyalik himoyachi barcha musobaqalarni inobatga olganda 18 ta uchrashuvda ishtirok etib, bitta gol muallifiga aylandi. Ta’kidlash joizki, futbolchining hisobida hozircha bor-yo‘g‘i bitta ogohlantirish (sariq kartochka) mavjud.