«Barselona» xavfsizlik maqsadida Chempionlar ligasi 1/4 finali doirasidagi «Atletiko»ga qarshi birinchi o‘yindan boshlab abonementlardan foydalanish va chiptalar sotuvi bo‘yicha yangi choralarni joriy etadi.
Mundo Deportivo nashrining xabar berishicha, abonementlarni boshqa shaxsga o‘tkazish imkoniyati o‘yin boshlanishidan 24 soat oldin bloklanadi. Bundan tashqari, chipta sotib oluvchi barcha muxlislar o‘yin boshlanishiga kamida 24 soat qolganda o‘z shaxsiy ma’lumotlarini tizimga kiritishlari shart.
Shuningdek, stadionga tashrif buyurishni tasdiqlash muddatlari ham o‘zgardi — endi bu o‘yinga 96-48 soat qolganda amalga oshirilishi kerak. Agar tasdiqlash belgilangan muddatdan tashqari vaqtda bajarilsa, klub tomoshabinga joy ajratilishini kafolatlay olmaydi.
Eslatib o‘tamiz, «Barsa» 4 aprel kuni La Liga doirasida Madridda «Atletiko» mehmoni bo‘ladi, 8 aprelda esa YECHL doirasida madridliklarni o‘z uyida qabul qiladi. 14 aprel kuni esa yevrokubokning javob uchrashuvi yana «matraschilar» maydonida bo‘lib o‘tadi.
