«Nyukasl» Lyuis Mayli bilan yangi shartnoma imzolash istagida. Bu haqda jurnalist Fabrisio Romano o‘zining ijtimoiy tarmoqlarida ma’lum qildi.

Manbaning bergan ma’lumotiga ko‘ra, muzokaralar allaqachon boshlangan. Yosh va iqtidorli yarim himoyachi bir nechta top-klublarning e’tiborida turibdi. Avvalroq aynan Romano ushbu jamoalar APL va Bundesliga vakillari ekanligi haqida yozgan edi.

«Nyukasl» rahbariyati Mayli o‘z qadrdon klubida qolishiga umid qilmoqda va uni kelajakda asosiy tarkibning muhim o‘yinchisi sifatida ko‘rmoqda. 19 yoshli futbolchi joriy mavsumda 30 ta o‘yinda ishtirok etdi va maydonda o‘rtacha 59 daqiqadan harakat qildi. U o‘z hisobiga 3 ta gol va 3 ta golli uzatmani yozdirib qo‘ygan.

Transfermarkt portali Maylining transfer qiymatini 25 million yevroga baholamoqda.