«Ньюкасл» Льюис Майли билан янги шартнома имзолаш истагида. Бу ҳақда журналист Фабрицио Романо ўзининг ижтимоий тармоқларида маълум қилди.

Манбанинг берган маълумотига кўра, музокаралар аллақачон бошланган. Ёш ва иқтидорли ярим ҳимоячи бир нечта топ-клубларнинг эътиборида турибди. Аввалроқ айнан Романо ушбу жамоалар АПЛ ва Бундеслига вакиллари эканлиги ҳақида ёзган эди.

«Ньюкасл» раҳбарияти Майли ўз қадрдон клубида қолишига умид қилмоқда ва уни келажакда асосий таркибнинг муҳим ўйинчиси сифатида кўрмоқда. 19 ёшли футболчи жорий мавсумда 30 та ўйинда иштирок этди ва майдонда ўртача 59 дақиқадан ҳаракат қилди. У ўз ҳисобига 3 та гол ва 3 та голли узатмани ёздириб қўйган.

Transfermarkt портали Майлининг трансфер қийматини 25 миллион еврога баҳоламоқда.