«Nottingem Forest» klubi Roman Abramovich davridagi moliyaviy qoidabuzarliklar uchun «Chelsi»ga berilgan jazoni o‘ta yengil deb hisoblamoqda.

Londonliklar 10,75 million funt miqdorida jarimaga tortildi va ularga transferlar uchun shartli taqiq qo‘yildi.

The Athletic nashrining xabariga ko‘ra, «Nottingem» APLga rasmiy shikoyat kiritish imkoniyatini ko‘rib chiqmoqda. Qayd etilishicha, futbol jamoatchiligi orasida ko‘pchilik «Chelsi»ga nisbatan qo‘llanilgan sanksiyalarni yetarli emas deb topgan, chunki klub sport jazolaridan (ochko olib tashlanishidan) qutilib qolgan.

Eslatib o‘tamiz, 2024 yilning mart oyida APL «Nottingem Forest»ni 2022/23 yilgi mavsum yakunlariga ko‘ra foyda va barqarorlik qoidalarini (PSR) buzgani uchun 4 ochkodan mahrum qilgan edi — klub ruxsat etilgan zarar limitidan 34,5 mln funtga o‘tib ketgandi. Klubning apellyasiyasi esa rad etilgan.