«Roma» markaziy himoyachisi Evan N'Dika faoliyatini «Barselona»da davom ettirishi mumkin. Bu haqda Caught Offside nashri xabar bermoqda.

Manbaning ma’lumotlariga ko‘ra, «ko‘k-anorranglilar» 26 yoshli fransiyalik futbolchini o‘z safiga qo‘shib olishga qiziqish bildirmoqda. Biroq ta’kidlanishicha, agar kataloniyaliklar himoyachini sotib olishga qaror qilishsa, ular Angliya Premyer-ligasining uchta grandi — «Tottenxem», «Liverpul» va «Manchester Yunayted» bilan bo‘ladigan raqobatda g‘olib chiqishlariga to‘g‘ri keladi.

Joriy mavsumda N'Dika barcha turnirlarni hisobga olganda 35 ta uchrashuvda ishtirok etdi va o‘z hisobiga beshta gol yozdirib qo‘ydi.

Transfermarkt portali mutaxassislari futbolchining qiymatini 35 million yevroga baholamoqdalar.