Ruminiya terma jamoasi bosh murabbiyi Mircha Luchesku yurak xurujini (infarkt) boshdan kechirgani haqidagi ma’lumotlarni rad etdi.

Mutaxassisning so‘zlariga ko‘ra, milliy jamoa mashg‘uloti paytida unda fibrillyasiya (yurak ritmining buzilishi) yuzaga kelgan. Luchesku bu uning faoliyatidagi uchinchi holat ekanligini qo‘shimcha qildi.

«Hozir ahvolim yaxshi. Turkiya bilan o‘yinni tahlil qilishni boshlaganimda juda qattiq g‘azablandim, vaholanki o‘sha bahsdan beri uch kun o‘tgan edi. Ana shu asabiy zo‘riqish tufayli o‘zimni yomon his qildim», — deya Lucheskuning so‘zlarini Golazo nashri keltirmoqda.

U nafas olishda qiyinchilikka duch kelgan, biroq yurak to‘xtashi sodir bo‘lmagan. Yaqin orada Luchesku bir qator tibbiy ko‘ririklardan o‘tishi kerak. U ruminlarning Slovakiyaga qarshi safardagi o‘rtoqlik uchrashuvini o‘tkazib yuboradi.

Eslatib o‘tamiz, 80 yoshli mutaxassis kecha mashg‘ulot paytida hushidan ketgan va zudlik bilan shifoxonaga yotqizilgan edi.