«Real» klubida kelasi mavsum uchun tarkib bo‘yicha rejalar tuzilmoqda. Unga ko‘ra, madridliklarning hujumkor yarim himoyachisi Franko Mastantuono jamoani tark etishi mumkin.
OK Diario nashrining xabar berishicha, «Real» Mastantuononi tajriba oshirish uchun boshqa jamoaga ijaraga berish variantini ko‘rib chiqmoqda. Gap keyinchalik sotib olish huquqisiz beriladigan oddiy ijara haqida bormoqda.
Madridliklar Mastantuononing muntazam o‘yin amaliyotiga ega bo‘lishini va rivojlanishini istashmoqda. Avvalroq, o‘tgan qishda klub xuddi shu maqsadda Endrikni «Lion»ga ijaraga qo‘yib yuborgan edi. Braziliyalik hujumchi shu yozda Madridga qaytadi.
Eslatib o‘tamiz, Franko Mastantuono o‘tgan yozda, voyaga yetganidan so‘ng «Real» tarkibiga kelib qo‘shilgan edi. O‘shandan beri argentinalik futbolchi 27 ta o‘yinda maydonga tushib, o‘z hisobiga uchta gol va bitta golli uzatmani yozdirib qo‘ydi.
