«Реал» клубида келаси мавсум учун таркиб бўйича режалар тузилмоқда. Унга кўра, мадридликларнинг ҳужумкор ярим ҳимоячиси Франко Мастантуоно жамоани тарк этиши мумкин.
OK Diario нашрининг хабар беришича, «Реал» Мастантуонони тажриба ошириш учун бошқа жамоага ижарага бериш вариантини кўриб чиқмоқда. Гап кейинчалик сотиб олиш ҳуқуқисиз бериладиган оддий ижара ҳақида бормоқда.
Мадридликлар Мастантуононинг мунтазам ўйин амалиётига эга бўлишини ва ривожланишини исташмоқда. Аввалроқ, ўтган қишда клуб худди шу мақсадда Эндрикни «Лион»га ижарага қўйиб юборган эди. Бразилиялик ҳужумчи шу ёзда Мадридга қайтади.
Эслатиб ўтамиз, Франко Мастантуоно ўтган ёзда, вояга етганидан сўнг «Реал» таркибига келиб қўшилган эди. Ўшандан бери аргентиналик футболчи 27 та ўйинда майдонга тушиб, ўз ҳисобига учта гол ва битта голли узатмани ёздириб қўйди.
