Madridning "Atletiko" klubi mavsumning juda tig‘iz yakuniga tayyorgarlik ko‘rmoqda — chempionatdan tashqari, jamoa Chempionlar ligasi va Ispaniya Kubogida ham kurashni davom ettirmoqda. Eslatib o‘tamiz, 18 aprel kuni madridliklar Ispaniya Kubogi finalida "Real Sosyedad" bilan to‘qnash kelishadi.

Bunday tig‘iz taqvim bir mavsumdagi o‘yinlar soni bo‘yicha klub rekordining yangilanishiga olib kelishi mumkin. Amaldagi rekord 2013/2014 yilgi mavsumda o‘rnatilgan bo‘lib, o‘shanda "Atletiko" chempionlikni qo‘lga kiritgan va Chempionlar ligasi finaligacha yetib borgan edi. O‘sha mavsumda jamoa jami 61 ta o‘yin o‘tkazgan.

Hozirgi vaqtda klub 59 ta o‘yin o‘tkazishi allaqachon kafolatlangan. Agar "Atletiko" Chempionlar ligasida avval "Barselona"ni, so‘ngra yarim finaldagi raqibini mag‘lub etsa, klub rekordi nafaqat takrorlanadi, balki yangilanadi ham.