Yaqinda tajribali mutaxassis Roy Xodjson Angliya Chempionshipi vakili «Bristol Siti» klubining vaqtinchalik bosh murabbiyiga aylandi. Murabbiy Bristol klubi bilan uzoq muddatli shartnoma imzolash ehtimoli yo‘qligini, chunki buning uchun yoshi ancha o‘tib qolganini ta’kidladi.

«Uzoq muddatli shartnoma? Yo‘q, men allaqachon ancha qarib qolganman. Mening yoshimda futbolning yuqori darajasida ishlash kam kuzatiladigan holat. Nafaqada juda baxtli edim, lekin ba’zida biroz zerikib qoldim. Bunday chorlovni rad etish qiyin edi», — deya Xojsonning so‘zlarini VVS nashri keltirmoqda.

Eslatib o‘tamiz, «Bristol Siti» ayni damda Chempionship turnir jadvalida 16-o‘rinni egallab turibdi. Klubning ligada jon saqlab qolish borasidagi imkoniyatlari yaxshi, xavfli hududdan farq 12 ochkoni tashkil etadi. Shunga qaramay, mashhur klubda quyi ligaga tushib ketish xavfi hali ham oz bo‘lsa-da mavjud.