«Manchester Siti» va «Barselona» klublarining sobiq hujumchisi, argentinalik Serxio Aguero oddiy havaskorlar turnirida jiddiy jarohat oldi. Gap axill payining uzilishi haqida bormoqda. Argentinalik yulduz maydonni o‘z oyoqlari bilan tark eta olmadi — unga jamoadoshlarining yordami kerak bo‘ldi. Endi 37 yoshli sobiq futbolchi jarrohlik stoliga yotishga majbur.
Eslatib o‘tamiz, Aguero 2021 yilda yuragidagi muammolar aniqlangach, faoliyatini zudlik bilan yakunlashga majbur bo‘lgan edi. Uning faoliyatidagi so‘nggi klub «Barselona» bo‘lib qoldi. Kataloniyaliklar safida u atigi to‘rtta o‘yinda maydonga tushib, bitta gol urishga ulgurgan edi.
