Argentina terma jamoasi bosh murabbiyi Lionel Skaloni Italiyaning jahon chempionatiga chiqa olmagani haqida gapirdi. «Skuadra Adzurra» JCH-2026 yo‘llanmasi uchun kechgan hal qiluvchi bahsda Bosniya va Gersegovinaga imkoniyatni boy berdi — yo‘llanma taqdirini penaltilar seriyasi hal qildi.
«Italiya bilan sodir bo‘lgan voqea meni xafa qildi. Mening kelib chiqishim italiyalik, u yerda to‘p surganman. Bu Argentina uchun qardosh davlat, u yerda bizni juda yaxshi ko‘rishadi. Italiyaning jahon chempionatida ishtirok etmasligi argentinaliklarni aslo quvontirmaydi», — deya Skalonining so‘zlarini keltirmoqda AlbicelesteTalk.
Italiya terma jamoasi ketma-ket uchinchi bor mundialni o‘tkazib yuboradi — ilgari bunday holat kuzatilmagan edi.
«Albiseleste»da esa vaziyat ancha tinch: amaldagi jahon chempionlari Zambiyaga qarshi o‘rtoqlik uchrashuvida maydonga tushib, 5:0 hisobida g‘alaba qozonishdi.
