Аргентина терма жамоаси бош мураббийи Лионель Скалони Италиянинг жаҳон чемпионатига чиқа олмагани ҳақида гапирди. «Скуадра Адзурра» ЖЧ-2026 йўлланмаси учун кечган ҳал қилувчи баҳсда Босния ва Герцеговинага имкониятни бой берди — йўлланма тақдирини пенальтилар серияси ҳал қилди.

«Италия билан содир бўлган воқеа мени хафа қилди. Менинг келиб чиқишим италиялик, у ерда тўп сурганман. Бу Аргентина учун қардош давлат, у ерда бизни жуда яхши кўришади. Италиянинг жаҳон чемпионатида иштирок этмаслиги аргентиналикларни асло қувонтирмайди», — дея Скалонининг сўзларини келтирмоқда AlbicelesteTalk.

Италия терма жамоаси кетма-кет учинчи бор мундиални ўтказиб юборади — илгари бундай ҳолат кузатилмаган эди.

«Альбиселесте»да эса вазият анча тинч: амалдаги жаҳон чемпионлари Замбияга қарши ўртоқлик учрашувида майдонга тушиб, 5:0 ҳисобида ғалаба қозонишди.