"Chelsi" va "Liverpul" klublari "Monako"ning 22 yoshli yarim himoyachisi Lamin Kamarani kuzatib borishmoqda. Bu haqda Caught Offside nashri xabar bermoqda.

Manbaning ma’lumotiga ko‘ra, monegasklar futbolchini sotish variantini ko‘rib chiqishga tayyor, biroq uni kamida 65-75 million yevroga baholashmoqda. Kamaraning shartnomasida tovon puli haqida band yo‘q. Shu bilan birga, "Monako" o‘yinchini tezroq sotishga intilmayapti, chunki uning qiymati yanada oshishi mumkin deb hisoblaydi.

Avvalroq TEAMtalk portali senegallik futbolchiga "Manchester Yunayted" tomonidan qiziqish borligi haqida xabar bergan edi.

Joriy mavsumda Kamara barcha musobaqalarda 25 ta o‘yinda maydonga tushib, 4 ta golli uzatmani amalga oshirdi. Futbolchining klub bilan amaldagi shartnomasi 2029 yil yoziga qadar mo‘ljallangan. Transfermarkt portali ma’lumotlariga ko‘ra, uning bozor qiymati 35 million yevroni tashkil etadi.