Italiya terma jamoasi JCH–2026 ga chiqa olmadi. «Skuadra adzurra» ketma-ket uchinchi mundialni o‘tkazib yuboradigan bo‘ldi. Ushbu mavzuda mashhur italiyalik murabbiy Fabio Kapello o‘z fikrini bildirdi.

«Tun bo‘yi uxlay olmadim. Sodir bo‘lgan voqeaga haligacha ishona olmayapman. Gap to‘rt karra jahon chempionlari haqida ketmoqda — bu sport fojiasi, bu sharmandalik. Bu Italiya futbolining zamonaviy tarixida yuz bergan eng yomon voqealardan biridir», — deya Kapelloning so‘zlarini keltirmoqda Marca nashri.

Italiya terma jamoasi oxirgi marta 2014 yilgi jahon chempionatida ishtirok etgan edi. O‘shanda «skuadra adzurra» uchta o‘yinda uch ochko jamg‘arib, guruh bosqichidan o‘ta olmagan.