"Nyukasl Yunayted" yarim himoyachisi Sandro Tonalining agentlari uning xizmatlarini "Real Madrid" prezidenti Florentino Peresga taklif qilishdi. Tonalining o‘zi Angliyada qolishni istayotganiga qaramay, uning atrofidagilar Madrid klubiga o‘tish imkoniyatlari ustida faol ishlamoqda. Bu haqda TEAMtalk xabar bermoqda.
Agentlar "Real" rahbariyatiga "Nyukasl" o‘z yetakchisini 80 million funt (92 million yevro) evaziga qo‘yib yuborishga tayyorligini ma’lum qilishgan. Bu summa madridliklar uchun katta to‘siq bo‘lmasligi kerak.
Manbaga ko‘ra, agar "qirollik klubi" "Manchester Siti" yarim himoyachisi Rodrini qo‘lga kirita olmasa, Tonali "qaymoqranglilar" uchun zaxira varianti sifatida ko‘rilmoqda. Hozirda "Real" Tonali bilan muzokaralarni boshlashga shoshilmayapti, chunki ular Rodrini transfer qilish imkoniyatlarini yuqori baholashmoqda.
Joriy mavsumda Tonali "Nyukasl" safida 47 ta o‘yinda maydonga tushib, 3 ta gol urdi va 7 ta golli uzatmani amalga oshirdi. Transfermarkt bahosiga ko‘ra, italiyalik futbolchining bozor qiymati 80 million yevroni tashkil etadi.
