"Ньюкасл Юнайтед" ярим ҳимоячиси Сандро Тоналининг агентлари унинг хизматларини "Реал Мадрид" президенти Флорентино Пересга таклиф қилишди. Тоналининг ўзи Англияда қолишни истаётганига қарамай, унинг атрофидагилар Мадрид клубига ўтиш имкониятлари устида фаол ишламоқда. Бу ҳақда TEAMtalk хабар бермоқда.
Агентлар "Реал" раҳбариятига "Ньюкасл" ўз етакчисини 80 миллион фунт (92 миллион евро) эвазига қўйиб юборишга тайёрлигини маълум қилишган. Бу сумма мадридликлар учун катта тўсиқ бўлмаслиги керак.
Манбага кўра, агар "қироллик клуби" "Манчестер Сити" ярим ҳимоячиси Родрини қўлга кирита олмаса, Тонали "қаймоқранглилар" учун захира варианти сифатида кўрилмоқда. Ҳозирда "Реал" Тонали билан музокараларни бошлашга шошилмаяпти, чунки улар Родрини трансфер қилиш имкониятларини юқори баҳолашмоқда.
Жорий мавсумда Тонали "Ньюкасл" сафида 47 та ўйинда майдонга тушиб, 3 та гол урди ва 7 та голли узатмани амалга оширди. Transfermarkt баҳосига кўра, италиялик футболчининг бозор қиймати 80 миллион еврони ташкил этади.
