Alessandro Bastonining maydondan chetlatilishi Italiya hamda Bosniya va Gersegovina terma jamoalari o‘rtasidagi Jahon chempionati yo‘llanmasi uchun kechgan pley-off final uchrashuvi taqdirini o‘zgartirib yubordi.
Milanning «Inter» klubi markaziy himoyachisi 41-daqiqada to‘g‘ridan-to‘g‘ri qizil kartochka oldi, shundan so‘ng italiyaliklar himoyaga yotishga majbur bo‘lishdi. Minimal ustunlikni saqlab qolishning iloji bo‘lmadi — bosniyaliklar bahs yakunida hisobni tenglashtirishdi. Penaltilar seriyasida esa «skuadra adzurra» 1:4 hisobida imkoniyatni boy berdi — Italiya yana Jahon chempionatisiz qoldi.
Jurnalist Fabrisio Romanoning ma’lumotlariga ko‘ra, «Barselona» Bastonining terma jamoa uchun muhim bo‘lgan bahsdagi shov-shuvli omadsizligiga qaramay, uni sotib olish fikridan qaytmagan. 26 yoshli futbolchi «ko‘k-anorranglilar» uchun asosiy transfer maqsadi bo‘lib qolmoqda — uning vakillari bilan muzokaralar allaqachon boshlangan.
