Ispaniya Bosh vaziri Pedro Sanches Ispaniya va Misr terma jamoalari o‘rtasidagi o‘rtoqlik uchrashuvi (0:0) vaqtida musulmonlarga nisbatan aytilgan haqoratli hayqiriqlarni qoraladi.
O‘yin 31 mart kuni Barselonada bo‘lib o‘tdi. Taxminan 20-daqiqada muxlislarning bir qismi «Kimki sakramasa, u musulmon» qabilidagi shiorlarni ayta boshladi. «RCDE Stedium»dagi tomoshabinlarning bir qismi ushbu hayqiriq ohangiga mos ravishda sakrashni boshlagan. Kataloniya polisiyasi mazkur holat yuzasidan jinoiy tergov boshladi.
«Kechagi hodisa mutlaqo qabul qilib bo‘lmas holat va u boshqa takrorlanmasligi lozim. Madaniyatsiz ozchilikning ko‘p fikrli va bag‘rikeng mamlakat bo‘lgan Ispaniya imijiga putur yetkazishiga yo‘l qo‘yib bo‘lmaydi. Milliy terma jamoa va uning muxlislari ham bundan mustasno emas.
Jabr ko‘rgan sportchilarni chin qalbdan qo‘llab-quvvatlashimni bildiraman va o‘z hurmati bilan mamlakatimizning yaxshilanishiga hissa qo‘shayotganlarni olqishlayman», — deb yozdi Sanches.
