Испания Бош вазири Педро Санчес Испания ва Миср терма жамоалари ўртасидаги ўртоқлик учрашуви (0:0) вақтида мусулмонларга нисбатан айтилган ҳақоратли ҳайқириқларни қоралади.

Ўйин 31 март куни Барселонада бўлиб ўтди. Тахминан 20-дақиқада мухлисларнинг бир қисми «Кимки сакрамаса, у мусулмон» қабилидаги шиорларни айта бошлади. «RCDE Стэдиум»даги томошабинларнинг бир қисми ушбу ҳайқириқ оҳангига мос равишда сакрашни бошлаган. Каталония полицияси мазкур ҳолат юзасидан жиноий тергов бошлади.

«Кечаги ҳодиса мутлақо қабул қилиб бўлмас ҳолат ва у бошқа такрорланмаслиги лозим. Маданиятсиз озчиликнинг кўп фикрли ва бағрикенг мамлакат бўлган Испания имижига путур етказишига йўл қўйиб бўлмайди. Миллий терма жамоа ва унинг мухлислари ҳам бундан мустасно эмас.

Жабр кўрган спортчиларни чин қалбдан қўллаб-қувватлашимни билдираман ва ўз ҳурмати билан мамлакатимизнинг яхшиланишига ҳисса қўшаётганларни олқишлайман», — деб ёзди Санчес.