Ҳужумчи Хулиан Альвареснинг келажаги трансфер оламидаги энг асосий мавзулардан бири бўлиб турибди. Аргентиналик футболчи Мадриднинг «Атлетико» клубидан «Барселона»га ўтишни истаётгани кундек равшан — яқиндагина Хулиан ўз орзусини амалга ошириш учун клубни ўзгартириш ниятида эканини очиқчасига тан олди. «Матрасчилар» эса ўзларининг асосий юлдузларидан бири билан хайрлашишни, айниқса, Ла Лигадаги бош рақобатчиларини кучайтиришни асло хоҳлашмаяпти.

The Touchline нашрининг COPE радиосига таяниб хабар беришича, «Атлетико» Альваресни «Барселона» ёки «Реал Мадрид» клубларига сотишни хаёлига ҳам келтирмаяпти.

Аввалроқ матбуотда Мадрид клуби 26 ёшли Альваресни Лондоннинг «Арсенал» жамоасига сотишни афзал кўраётгани ҳақида хабарлар тарқалган эди.

Қайд этилишича, «Атлетико» раҳбарияти «Барселона» учун ягона шартни маълум қилган: каталонияликлар Альваресни фақат шартномада кўрсатилган 500 миллион евролик товон пулини тўлиқ тўлаган тақдирдагина сотиб олишлари мумкин. Табиики, молиявий қийинчиликларни бошдан кечираётган «кўк-анорранглилар» футболчи учун бунча маблағ ажрата олишмайди.