Қатар терма жамоаси «В» гуруҳида сўнгги ўринни эгаллаб, жаҳон чемпионати билан хайрлашди. Хулен Лопетеги шогирдлари Швейцария (1:1), Канада (0:6) ва Босния ва Герцеговинага (1:3) қарши кечган баҳсларда бор-йўғи бир очко жамғаришга муваффақ бўлишди, холос.

Шу тариқа, айни пайтга келиб мусобақадаги иштирокини муддатидан олдин якунлаган жамоалар сони 6 тага етди. Дастлабки икки тур якунларига кўра, Гаити, Туркия, Тунис, Иордания ва Панама терма жамоалари плей-оффга чиқиш имкониятини бутунлай йўқотган эди. Эндиликда ушбу муваффақиятсизлар рўйхатига Қатар ҳам қўшилди.

Мусобақа тақвимига кўра, яқин соатларда «С» ва «А» гуруҳларида ҳам сўнгги тур учрашувларига старт берилади ва унда ҳам бир қатор жамоаларнинг тақдирига ойдинлик киритилади.

Эслатиб ўтамиз, ЖЧ-2026 мусобақаси 19 июлга қадар давом этади. Амалдаги жаҳон чемпиони Аргентина терма жамоаси ҳисобланади.